ہیٹ برسٹ کی افواہیں بے بنیادہیں، محکمہ موسمیات

(دن نیوز)محکمۂ موسمیات پاکستان نے جنوبی پنجاب میں ہیٹ برسٹ سے متعلق زیرِ گردش خبروں کو بے بنیاد اور گمراہ کن قرار دے دیا ہے۔ ادارے کے مطابق سوشل میڈیا اور دیگر ذرائع پر پھیلنے والی اطلاعات میں کوئی صداقت نہیں اور عوام کو ان پر یقین نہیں کرنا چاہیے۔

محکمۂ موسمیات کے مطابق نہ تو “سُپر ایل نینو” سے متعلق کوئی ایڈوائزری جاری کی گئی ہے اور نہ ہی درجۂ حرارت میں کسی غیر معمولی اضافے کی پیشگوئی کی گئی ہے۔ حکام کا کہنا ہے کہ رات کے اوقات میں درجۂ حرارت 45 سے 50 ڈگری سینٹی گریڈ تک پہنچنے کی خبریں مکمل طور پر من گھڑت ہیں اور ان کا حقیقت سے کوئی تعلق نہیں۔

ادارے نے واضح کیا کہ ہیٹ برسٹ ایک نایاب موسمی مظہر ہے، تاہم موجودہ حالات میں ایسے کسی واقعے کا امکان نہیں۔ اسی طرح سانس لینے میں دشواری یا دیگر صحت سے متعلق خدشات پر مبنی افواہوں کو بھی مسترد کر دیا گیا ہے۔

محکمۂ موسمیات نے شہریوں کو مشورہ دیا ہے کہ وہ مستند معلومات کے لیے صرف سرکاری ذرائع پر انحصار کریں اور غیر مصدقہ خبروں کو پھیلانے سے گریز کریں، کیونکہ اس سے بلاوجہ خوف و ہراس پیدا ہو سکتا ہے۔

دوسری جانب کراچی کے حوالے سے بتایا گیا ہے کہ آج موسم گرم اور مرطوب رہنے کا امکان ہے، جبکہ درجۂ حرارت معمول کے مطابق رہے گا۔ ہوا میں نمی کا تناسب زیادہ ہونے کے باعث گرمی کی شدت زیادہ محسوس ہو سکتی ہے، تاہم کسی غیر معمولی موسمی صورتحال کی پیشگوئی نہیں کی گئی۔

ماہرین کا کہنا ہے کہ موسم سے متعلق افواہوں کے بجائے مستند معلومات پر اعتماد کرنا ضروری ہے تاکہ عوام میں بے چینی سے بچا جا سکے اور درست احتیاطی تدابیر اختیار کی جا سکیں۔