(دن نیوز)وزارت صحت پاکستان اوریونیسیف کی مشترکہ رپورٹ میں پاکستانی بچوں کے خون میں سیسے کی موجودگی کا چونکا دینے والا انکشاف سامنے آیا ہے، جس نے ماہرین صحت اور والدین میں تشویش کی لہر دوڑا دی ہے۔
رپورٹ کے مطابق ملک کے سات بڑے شہروں میں بچوں کے خون کے نمونے لیے گئے، جن میں کوئٹہ،پشاور،لاہور،کراچی،ہری پور،اسلام آباد اورراولپنڈی شامل ہیں۔ تحقیق میں انکشاف ہوا کہ 1 سے 3 سال کی عمر کے 10 میں سے 4 بچوں کے خون میں سیسے کی مقدار موجود ہے، جو ایک سنگین صحت کا مسئلہ ہے۔
رپورٹ کے مطابق سب سے زیادہ تشویشناک صورتحال ہری پور کے علاقے حطار میں دیکھی گئی، جہاں 88 فیصد بچوں کے خون میں سیسہ پایا گیا۔ یہ شرح دیگر علاقوں کے مقابلے میں کہیں زیادہ ہے اور ماحولیاتی آلودگی یا صنعتی سرگرمیوں کی جانب اشارہ کرتی ہے۔ دوسری جانب اسلام آباد میں سیسے کی شرح نسبتاً کم، صرف 1 فیصد رپورٹ کی گئی۔
ماہرین کے مطابق سیسہ ایک خطرناک دھات ہے جو بچوں کی ذہنی نشوونما، سیکھنے کی صلاحیت اور اعصابی نظام پر منفی اثرات ڈال سکتی ہے۔ کم عمر بچوں میں اس کے اثرات زیادہ شدید ہو سکتے ہیں، جس سے ان کی طویل مدتی صحت متاثر ہونے کا خدشہ ہوتا ہے۔
رپورٹ میں اس بات پر زور دیا گیا ہے کہ آلودگی کے ذرائع کی نشاندہی کر کے فوری اقدامات کیے جائیں تاکہ بچوں کو اس خطرناک عنصر سے محفوظ رکھا جا سکے۔ ماہرین نے والدین کو بھی احتیاطی تدابیر اختیار کرنے کا مشورہ دیا ہے، جن میں صاف پانی کا استعمال، ہاتھوں کی صفائی اور آلودہ ماحول سے دوری شامل ہے۔
ماہرین صحت کا کہنا ہے کہ اس مسئلے سے نمٹنے کے لیے حکومتی سطح پر جامع حکمت عملی کی ضرورت ہے تاکہ آنے والی نسلوں کی صحت کو محفوظ بنایا جا سکے اور ماحولیاتی آلودگی پر قابو پایا جا سکے۔