(دن نیوز) لاہور میں انسداد پولیو مہم کا آغاز 18 مئی سے کیا جائے گا، جس کے تحت شہر بھر میں 22 لاکھ سے زائد بچوں کو پولیو سے بچاؤ کے قطرے پلانے کا ہدف مقرر کیا گیا ہے۔ ضلعی انتظامیہ کے مطابق مہم کے انتظامات کو حتمی شکل دی جا رہی ہے اور اس سلسلے میں متعلقہ اداروں کے ساتھ رابطہ کاری کا عمل بھی تیز کر دیا گیا ہے تاکہ مہم کو مؤثر اور جامع انداز میں مکمل کیا جا سکے۔ حکام کے مطابق اس مہم میں مجموعی طور پر 5 ہزار 825 موبائل پولیو ٹیمیں حصہ لیں گی جو گھر گھر جا کر پانچ سال سے کم عمر بچوں کو پولیو ویکسین فراہم کریں گی۔ انتظامیہ کا کہنا ہے کہ مہم کو مزید مؤثر بنانے کے لیے ڈپٹی کمشنر کی جانب سے World Health Organization اور محکمہ صحت سے تجاویز طلب کی گئی ہیں، جبکہ یونین کونسل میڈیکل افسران کو خصوصی اہداف اور ذمہ داریاں بھی سونپی گئی ہیں تاکہ مہم کے دوران کوریج کو زیادہ سے زیادہ یقینی بنایا جا سکے۔ حکام کے مطابق انسداد پولیو مہم ممکنہ طور پر پانچ سے سات روز تک جاری رہے گی، جس کے دوران خصوصی نگرانی اور مانیٹرنگ کے انتظامات بھی کیے جائیں گے۔ ضلعی انتظامیہ نے اس عزم کا اظہار کیا ہے کہ مہم کے دوران کسی بھی بچے کو ویکسین سے محروم نہیں رہنے دیا جائے گا اور تمام علاقوں میں ٹیموں کی مؤثر رسائی کو یقینی بنایا جائے گا۔ یاد رہے کہ گزشتہ پولیو مہم کے دوران بھی 22 لاکھ بچوں کو پولیو سے بچاؤ کے قطرے پلائے گئے تھے اور مقررہ ہدف مکمل طور پر حاصل کر لیا گیا تھا۔ حکام کے مطابق نئی مہم کا مقصد شہر میں پولیو کے خطرات کا مکمل خاتمہ اور بچوں کو اس موذی مرض سے محفوظ رکھنا ہے۔