لاہور کے سیوریج میں پولیو وائرس کی دوبارہ موجودگی کی تصدیق

(دن نیوز) لاہور کے سیوریج نظام میں ایک بار پھر پولیو وائرس کی موجودگی کی تصدیق ہوئی ہے جس کے بعد شہر میں صحت عامہ سے متعلق تشویش میں اضافہ ہو گیا ہے۔ ذرائع کے مطابق آؤٹ فال روڈ ڈسپوزل اسٹیشن سے حاصل کیے گئے سیوریج کے نمونوں میں پولیو وائرس پایا گیا، جنہیں اپریل کے دوران اکٹھا کر کے قومی ادارہ صحت کو تجزیے کے لیے بھجوایا گیا تھا۔ لیبارٹری رپورٹ میں ایک نمونے میں وائرس کی موجودگی کی تصدیق ہونے کے بعد متعلقہ اداروں کو آگاہ کر دیا گیا ہے۔ ماہرین صحت کے مطابق سیوریج میں پولیو وائرس کی موجودگی اس بات کی نشاندہی کرتی ہے کہ وائرس اب بھی معاشرے میں گردش کر رہا ہے، چاہے اس کے واضح مریض سامنے نہ آئے ہوں۔ اس صورتحال نے شہر میں جاری انسداد پولیو مہم کی مؤثریت پر بھی سوالات اٹھا دیے ہیں اور ماہرین نے ویکسینیشن کی کوریج مزید بہتر بنانے کی ضرورت پر زور دیا ہے۔ سرکاری اعداد و شمار کے مطابق لاہور سمیت ملک بھر میں پولیو سے بچاؤ کی مہمات باقاعدگی سے جاری ہیں اور بچوں کو ویکسین کے قطرے پلائے جا رہے ہیں، تاہم اس کے باوجود سیوریج میں وائرس کی موجودگی اس بات کی علامت ہے کہ تمام بچوں تک ویکسین کی مکمل رسائی یقینی نہیں بن سکی۔ شہری حلقوں کی جانب سے بھی اس صورتحال پر تشویش کا اظہار کیا جا رہا ہے اور متعلقہ پولیو پروگرام کی کارکردگی پر سوالات اٹھائے جا رہے ہیں۔ ماہرین کا کہنا ہے کہ پولیو کے خاتمے کے لیے نہ صرف مہمات کو مزید مؤثر بنانے کی ضرورت ہے بلکہ کمیونٹی سطح پر آگاہی اور مکمل ویکسینیشن کوریج کو بھی یقینی بنانا ہوگا تاکہ وائرس کے پھیلاؤ کو روکا جا سکے۔