(دن نیوز)پاکستان کی سابق قومی بیڈمنٹن چیمپئن پلوشہ بشیر نے کینیڈین ماسٹرز بیڈمنٹن چیمپئن شپ میں شاندار کارکردگی کا مظاہرہ کرتے ہوئے 35 پلس ویمنز سنگلز کا ٹائٹل اپنے نام کر لیا۔ ان کی اس کامیابی کو پاکستانی بیڈمنٹن کے لیے ایک اہم اعزاز قرار دیا جا رہا ہے۔
فائنل مقابلے میں پلوشہ بشیر کا سامنا کینیڈا کی ٹاپ سیڈ کھلاڑی اینا رائس سے ہوا، جہاں پاکستانی کھلاڑی نے بہترین کھیل پیش کرتے ہوئے کامیابی حاصل کی اور ٹرافی جیت لی۔ ایونٹ میں مختلف ممالک سے 300 سے زائد کھلاڑی شریک ہوئے، جس کے باعث مقابلے انتہائی سخت اور دلچسپ رہے۔
فتح کے بعد پلوشہ بشیر نے اپنی خوشی کا اظہار کرتے ہوئے کہا کہ عالمی سطح کے اس ایونٹ میں کامیابی حاصل کرنا ان کے لیے باعثِ فخر ہے۔ انہوں نے کہا کہ ماسٹرز کیٹیگری میں شرکت کا یہ مطلب ہرگز نہیں کہ ان کا اوپن کیٹیگری کیریئر ختم ہو چکا ہے بلکہ وہ مستقبل میں بھی اعلیٰ سطح پر پاکستان کی نمائندگی جاری رکھنا چاہتی ہیں۔
کراچی سے تعلق رکھنے والی پلوشہ بشیر پاکستان کی نمایاں بیڈمنٹن کھلاڑیوں میں شمار ہوتی ہیں۔ انہوں نے 2009 میں پہلی مرتبہ قومی ویمنز سنگلز اور ڈبلز ٹائٹلز جیت کر اپنی صلاحیتوں کا لوہا منوایا تھا۔ اس کے علاوہ وہ 2010 کے ساؤتھ ایشین گیمز میں کانسی کا تمغہ بھی حاصل کر چکی ہیں۔
پلوشہ بشیر نے 2014 ایشین گیمز اور 2014 و 2018 کامن ویلتھ گیمز میں بھی پاکستان کی نمائندگی کی، جہاں انہوں نے بین الاقوامی سطح پر ملک کا نام روشن کیا۔ ان کی حالیہ کامیابی نوجوان کھلاڑیوں کے لیے بھی ایک حوصلہ افزا مثال سمجھی جا رہی ہے۔
