(دن نیوز) امریکا کی ریاست فلوریڈا کے شہر میامی میں پالتو جانوروں سے متعلق ایک منفرد تقریب منعقد کی گئی جہاں سیکڑوں کتوں کو ایک بڑی پول پارٹی میں جمع کر کے گینیز ورلڈ ریکارڈ قائم کرنے کی کوشش کی گئی۔ غیر ملکی میڈیا رپورٹس کے مطابق پالتو کتوں کیلئے مصنوعات اور سہولیات فراہم کرنے والی کمپنی “چیوی” نے چیوی بارک پارک میں اس خصوصی تقریب کا اہتمام کیا جس میں مختلف نسلوں، سائز اور عمر کے 277 کتوں نے شرکت کی۔ منتظمین کے مطابق تقریب کا مقصد دنیا کی سب سے بڑی “ڈاگ پول پارٹی” کا عالمی ریکارڈ اپنے نام کرنا تھا۔ ایونٹ کے دوران کتوں کیلئے خصوصی چھوٹے سوئمنگ پولز، کھیل کے مقامات اور ٹھنڈک فراہم کرنے والے انتظامات کیے گئے تھے جہاں کتوں نے اپنے مالکان کے ساتھ بھرپور سرگرمیوں میں حصہ لیا۔ تقریب میں شریک کتوں کو پانی میں ڈبکیاں لگاتے، کھیلتے اور مختلف تفریحی سرگرمیوں میں حصہ لیتے دیکھا گیا جبکہ شائقین اور جانوروں سے محبت رکھنے والے افراد کی بڑی تعداد بھی موقع پر موجود رہی۔ منتظمین کا کہنا تھا کہ ایونٹ کا مقصد صرف ریکارڈ قائم کرنا نہیں بلکہ پالتو جانوروں کی اہمیت اور ان کی دیکھ بھال سے متعلق شعور اجاگر کرنا بھی تھا۔ گینیز ورلڈ ریکارڈ کی جانب سے ایک اہلکار بھی تقریب میں موجود تھا جس نے شریک کتوں کی تعداد اور ایونٹ کے قواعد کا جائزہ لیا۔ منتظمین کے مطابق تمام کتوں کی باقاعدہ گنتی اور ریکارڈ کی تصدیق کا عمل مکمل کیا گیا جس کے بعد نتائج گینیز ورلڈ ریکارڈ حکام کو بھجوائے جائیں گے۔ تقریب کے دوران کتوں کیلئے خصوصی تحائف، خوراک اور تفریحی سرگرمیوں کا بھی اہتمام کیا گیا جبکہ کئی افراد نے اس منفرد ایونٹ کو سوشل میڈیا پر شیئر کیا۔ مقامی افراد نے تقریب کو دلچسپ اور منفرد قرار دیتے ہوئے کہا کہ ایسے ایونٹس پالتو جانوروں کے ساتھ لوگوں کے تعلق کو مزید مضبوط بناتے ہیں۔
