صدر اور وزیراعظم کی ملاقات،،افغانستان اور خطے کی صورتحال پر تبادلہ خیال

(دن نیوز) صدر مملکت آصف علی زرداری اور وزیر اعظم شہباز شریف کے درمیان ایوان صدر میں اہم ملاقات ہوئی جس میں افغانستان سے متعلق امور، خطے کی مجموعی صورتحال اور ملکی داخلی معاملات پر تفصیلی گفتگو کی گئی۔ سرکاری ذرائع کے مطابق ملاقات کے دوران خطے میں بدلتی ہوئی سیاسی و سیکیورٹی صورتحال کا جائزہ لیا گیا جبکہ پڑوسی ملک افغانستان سے متعلق مختلف امور پر بھی تبادلہ خیال کیا گیا۔ اجلاس میں قومی سلامتی، علاقائی استحکام اور موجودہ حالات کے تناظر میں پاکستان کی حکمت عملی پر غور کیا گیا۔ ملاقات کے دوران معرکۂ حق کے شہداء کو خراج عقیدت پیش کیا گیا اور پاک فوج سمیت سیکیورٹی اداروں کی پیشہ ورانہ صلاحیتوں اور خدمات کو سراہا گیا۔ ذرائع کے مطابق صدر مملکت نے وزیر اعظم کو ہدایت کی کہ عوام کو زیادہ سے زیادہ ریلیف فراہم کرنے کے لیے مؤثر اقدامات کیے جائیں اور مہنگائی کے دباؤ کو کم کرنے پر خصوصی توجہ دی جائے۔ ملاقات میں اشیائے ضروریہ کی قیمتوں، عوامی مشکلات اور معاشی صورتحال پر بھی گفتگو ہوئی جبکہ بنیادی اشیاء کی فراہمی یقینی بنانے کے حوالے سے مختلف تجاویز زیر غور آئیں۔ حکومتی حلقوں کے مطابق اجلاس میں اس امر پر بھی زور دیا گیا کہ عوامی فلاح اور معاشی استحکام حکومت کی اولین ترجیحات میں شامل رہیں گے۔ سیاسی مبصرین کے مطابق صدر اور وزیر اعظم کی یہ ملاقات داخلی و خارجی معاملات پر اعلیٰ سطحی مشاورت کا حصہ سمجھی جا رہی ہے، خاص طور پر ایسے وقت میں جب خطے میں سیکیورٹی اور سفارتی صورتحال تیزی سے تبدیل ہو رہی ہے۔