(دن نیوز)کراچی میں منشیات فروشی کے بڑے مقدمے میں گرفتار خاتون انمول عرف پنکی کے جسمانی ریمانڈ کی عدالت نے منظوری دیتے ہوئے اسے تین روز کیلئے پولیس کے حوالے کر دیا ہے جبکہ پولیس نے تفتیش مزید تیز کر دی ہے۔ پولیس حکام کے مطابق ڈی آئی جی ساؤتھ نے بتایا کہ ابتدائی طور پر عدالت نے ملزمہ کے جسمانی ریمانڈ کی درخواست مسترد کر دی تھی تاہم بعد ازاں دوبارہ استدعا کی گئی جسے منظور کر لیا گیا۔ حکام کے مطابق ملزمہ کے خلاف ماضی کے مقدمات اور مجرمانہ ریکارڈ سے متعلق تفصیلات بھی اکٹھی کی جا رہی ہیں تاکہ تفتیش کو مزید مضبوط بنایا جا سکے۔ پولیس کے مطابق ملزمہ کو کراچی کے علاقے گارڈن میں سول حساس اداروں کے ساتھ مشترکہ کارروائی کے دوران گرفتار کیا گیا تھا جہاں سے بڑی مقدار میں کوکین، کیمیکل اور دیگر منشیات برآمد ہوئیں جبکہ اس کے قبضے سے ایک پستول بھی ملا تھا۔ حکام کا کہنا ہے کہ برآمد ہونے والی منشیات کی مالیت کروڑوں روپے بتائی جا رہی ہے جس سے ظاہر ہوتا ہے کہ ملزمہ ایک بڑے نیٹ ورک سے منسلک ہو سکتی ہے۔ واقعے کے بعد تفتیشی ادارے اس کے رابطوں اور ممکنہ سپلائی چین کی چھان بین کر رہے ہیں تاکہ اس نیٹ ورک کے دیگر افراد تک پہنچا جا سکے۔ اس کیس سے متعلق یہ بھی سامنے آیا ہے کہ ابتدائی عدالتی پیشی کے دوران ملزمہ کو بغیر ہتھکڑی عدالت میں پیش کیا گیا تھا جس پر انتظامی سطح پر سوالات اٹھے تھے اور بعد ازاں متعلقہ پولیس اہلکاروں کے خلاف کارروائی بھی کی گئی۔ پولیس حکام کے مطابق اس کیس کو انتہائی اہمیت دی جا رہی ہے اور آئندہ چند دنوں میں مزید اہم پیش رفت متوقع ہے جبکہ ملزمہ سے مسلسل تفتیش جاری رہے گی۔
